O piragüismo e o kayak de río en augas tranquilas son deportes que están en auxe e que cada vez teñen máis adeptos. Precisamente por este motivo o Concello de Ames organiza uns cursos de iniciación ao piragüismo durante os meses de xullo e agosto. Esta actividade está dirixida á mocidade amiense que disporá dun total 75 prazas para poder participar nesta actividade. Esta actividade impartirase en dous grupos, un para nenos/as de 8 a 14 anos, e outro para rapaces e rapazas maiores de 15 anos. O prazo para apuntarse xa está aberto. Cómpre salientar que as prazas cubriranse por rigorosa orde de inscrición.
Se hai uns días se anunciaba que o Concello de Ames organiza cursos de natación para os meses de xullo e agosto agora toca falar dos cursos de iniciación ao piragüismo que se levarán a cabo durante os meses de verán na praia fluvial de Tapia, dado que alí existen unhas instalacións inmellorables para a práctica deste deporte. Estas actividades serán impartidas polo Club de Piragüismo Ribeiras do Tambre e contan coa colaboración da Deputación da Coruña.
Todas as persoas que desexen iniciarse ou perfeccionar a súa técnica poderán participar nestes cursos, segundo os grupos de idade establecidos. Os nenos e nenas de 8 a 14 anos que desexen iniciarse neste deporte asistirán as clases os luns, mércores e venres de 16:30 h. a 18:00 horas. Para esta actividade hai dispoñibles un total de 50 prazas e realizarase durante dous meses (xullo e agosto). Haberá dous cursos para os rapaces e rapazas destas idades, un en xullo e outro en agosto, e ofértanse 25 prazas por curso. O prazo de inscrición non ten límite de data, polo que os rapaces e rapazas interesados poderán apuntarse ata acabar as prazas. O prezo desta actividade é de 30 euros.
Ademais, establécese un segundo grupo para as persoas de máis de15 anos. Neste caso o curso realizarase os días 9, 10, 23 e 24 de xullo (sábado e domingo), en horario de 11:30 h. ás 13:30 horas. Para este grupo de idade hai 25 prazas dispoñibles, sendo preciso que haxa un mínimo 10 inscritos para a realización do curso. O prazo de preinscrición estará aberto ata o xoves 30 de xuño. Neste caso o custe é de 45 euros.
En canto ás inscricións, poderán realizarse na Casa da Cultura do Milladoiro e na Oficina de Cultura e Deportes de Bertamiráns (Pazo da Peregrina) das 9:00 h. ás 14:00 horas. O prazo para apuntarse nestes cursos xa está aberto. Cómpre salientar que as prazas cubriranse por rigorosa orde de inscrición.
RSS
